فيه براسي موّال

فيه براسي موّال ..مِش يا ليل ..ومش يا عين ..ونفسي أغنّيه ..بس كيف ؟؟ دلّوني ..!! إن حكيت أَخْ ..ألف أخّيخْ يطلعلي ..وإن شكيت لأبو وجدي ..أبو وجدي ما يسمعلي ..!! قلت يا ولد ..لا تنحبط ..روح لعدنان ..ترى عدنان سمّيع ..لقيت عدنان جاي من عند دكتور الآذان ..ومقرّرينلو عمليه لآذانو الثنتين ..!! شو الحظ الردي ..؟؟ قلت مالي إلاّ عبّاس ..هو إللي شايف حالتي ..وأكيد رحْ يوصفلي دوا ..لقيت عبّاس ماكِلْ ألف بُكْس وبُكْس على عيونو ..!! يلعن تاريخ هالشغلة ...!!

قالولي فيه وزير ..خذلو واسطة ..وحتى بدون هالواسطة تمشي أمورك ..سحبت حالي بتالي الليل ..وأخذت الواسطة الثقّالة ..قعدت مع الواسطة ..يابَيْ شو الأدب إللي نزل عليّ لحظتها ..!! أدب إيش وأخلاق إيش ؟؟ معقول هاظ أنا ؟؟ صدقوا ..لأني بالأخير صدّقت غصب عنّي ..!! وبيني وبينكو ..الموّال إللي براسي يستاهل الأدب إللي نازل عليّ فجأة ..!!
قال الوزير للواسطة : تفضل يابو فلان ..أنا في خدمتك ...قام أبو فلان تنحنح وأنا عيوني يبرقن شمال ويمين وقال : يا معالي الوزير ..شايف هالشب الحليوة ..فيه براسو موّال ..ومش لاقي حدا يسمعلو ..قلت أجيبو لمعاليك ..لأنّك سمّيع ..!! الوزير عدّل حالو وقالي : على أي آلة بتعزف ؟؟ وما حسّيت إلاّ وضحك ربنا نزل عليّ ..وهات إللي يوقّفني ...ها ها هوهو ..هي هي ..هع هع ..!!
قام الواسطة ..سمّعني كلمتين ناشفات ..اضطرّيت أكب عليهن ميّة حتى يصيرن مبلولات ..والوزير قام ..وأجا الشغّال طردنا أنا والواسطة ..مع إنّو قال من غير مطرود ...ولحد الآن الموّال براسي ..ويا خوفي يخربط موسيقى أفكاري ..!!

• أخبار متعلقة

• أفضل سيارات مازدا في استهلاك البنزين لعام 2018

• الفاخوري يعلن تبرع بنك الأردن بمليون دينار أردني لصندوق "همة وطن"

• توفيق فاخوري يدعم صندوق "همة وطن" بمبلغ نصف مليون دينار أردني

• شاهد لحظة سقوط الطائرة الأوكرانية بعد اشتعالها في الهواء

• مدرسة الموقر ترسم أجمل منظر – فيديو وصور

• مدرسة الموقر ترسم أجمل منظر

• بـرنامـج الـوكـيـل فـي إجـازة سـنـوية

• حفرة امتصاصية في جرش .. خطرٌ يُهدد المواطنين و يُضر السياحة | فيديو