فادي الجدع- طبعا انا حاليا عواطلي بدون شغل وبستنى بس يفتح موقع الروتري تبع السفارة الامريكية عشان اقدم طلب هجرة وانا وحظي ... من هون لاسبوعين راح يفتح وراح اقدم طلب ...
قبل سنة اصحابي رموو تلفونات النوكيا وبلشوو يعطوها جلكسيات ...قلت افااا وانا لازم احمل الجلكسي واشتري واحد بالتقسيط بـ500 ليرة وصار معي جلكسي ومبسووووط عليه ....
بس اتخوزقت وبعتوو بـ300 والحمدلله..
عبدالله النسور يا عبدالله النسور اقسمت عليك تجاوبني ع هالسؤال ... شو بدك تحكي لربك بس يسالك عن اللي بتعملوو فينا ؟؟
وكل ما نسالك بتصير تقوول انا عشان الاجيال القادمة .. يا اخي مالك ومال الاجيال القادمة ... خليك بهاي الاجيال التعبانه ...وراح اكون اكبر مثال الك عشان تفكني من سولافة الاجيال القادمة
انا مش هامل وطوول عمري متفووق دراسيا ... وخريج جامعة وجامعة بالاردن وحكومة مش خاصة ودارس تخصص قوي ... وعوطلي صارلي سنة ... ما خليت شغلة الا واشتغلتها اشي بشهادتي واشي بذراعي ... وبتقلي الاجيال القادمة .... يا اخي اتق الله في نفسك اولا وبعدين فينا ...
قسمابالله انك بتعرف الحرامية بالاسم ليش ما تنظف البلد منهم ...
يا اخي حط راسك براس مجلس النواب وقلهم تعالووو جاي ... انتوو اللي بدكم هالمنصب لوويش بتقبضوو كل هالرواتب والسفريات والتقاعد..
يا اخي ورب الكعبة بس اسمع الرواتب الخيالية اللي بوخذوها بصير معي شلل اطفال مبكر..
انزل عالوزارات وما حولها وما يتبعها نظفها وزي ما بسالك اسالهم .. شو بتعمل يخوي عشان توخذ هيك راتب ... جد والله جربت مره تسالهم هيك سؤال ... انا ما بصدق بس حدا يحكيلي راتب شركة فلان تابعه للحكومة 9000 ؟؟؟؟ وااااااااااااااال على شوو يمااا ؟؟
ابو زهير تعرف شو حلم حياتي ... تطلع عالتلفزيون الاردني وتقووول هالكلمتين ... بسم الله الرحمن الرحيم .. ايها الشعب الاردني الطيب بعد جمع التحريات والمعلومات وعلى مبدأ النزاهة والشفافية في التعامل ومخافة الله ... تبين لنا ان فلان بن فلان ابن علان حرامي .. وعلان بن فلان حرامي ... وبناءا على ذلك سيتم نفخه نفخا مبرحا عشان يتعلم انه يسرق مرة ثانية ويعرف انه الله حق
شايف محلاها وما اسهلها يا ابو زهير ... والله يا رجل لو خليت الضريبة ع كل شي مدوبلة ما حدا راح يزعل بس بكفي انك فضحت واحد من هالسرسرية
... مهو شغلة من 3 .. يا اما هالبلد فش فيها حرامية وكلهم اولياء ... او انت مش عارف من وين تبلش من كثر هالحرامية والفاسدين والحل بسيط ( بلش فيهم بالاحرف الابجديه واللي ببلش بحرف الالف اكل هوااا ) ... او انت مش شايف شغلك كويس وما تتشاطر الا علينا ... اختر الاجابة الصحيحة معاليك او دولتك ....!!!
وفي النهاية بتقوول المواطن راح يلمس الفرق .... فرق ايش ونلمسس شوو
المواطن ضاوي ورافع ايديه وانا 32 سنة ومعيش اشي لا مرة ولا سيارة ولا بيت ولا محل ولا صنعة ولا اشي.. كل اللي معي باكيت دخاني واحذر يا ابو زهير تقرب ع باكيت دخاني هو الوحيد اللي بقيلي .... بس بتعرف والله والله لو خليت حقه 3 ليرات لاضل ادخن يعني عادي ... والله لندّخن
دولة ابو زهير .... انا ما بعرف شي عنك ولا بدي اعرف ... بدي تعرف عن الشب الاردني هالمعلومة ... احنا جيل تعبان متحطم معنويا وماديا وانسانيا ... احناالنا الله يا ابو زهير ... وبصراحة اكتر عمري ما طلعت مظاهرة مش لاني جبان او خويفة ( في منه هالحكي ) .... بس لاني مش مقتنع بهيك شغلات .... ولا منضم لحزب او تيار او حراك .... بس يا اخي مشان الله مشان ربك مشان ... يا اخي والله تعبانين ومتخوزقين ...
-
أخبار متعلقة
-
أفضل سيارات مازدا في استهلاك البنزين لعام 2018
-
الفاخوري يعلن تبرع بنك الأردن بمليون دينار أردني لصندوق "همة وطن"
-
توفيق فاخوري يدعم صندوق "همة وطن" بمبلغ نصف مليون دينار أردني
-
شاهد لحظة سقوط الطائرة الأوكرانية بعد اشتعالها في الهواء
-
مدرسة الموقر ترسم أجمل منظر – فيديو وصور
-
مدرسة الموقر ترسم أجمل منظر
-
بـرنامـج الـوكـيـل فـي إجـازة سـنـوية
-
حفرة امتصاصية في جرش .. خطرٌ يُهدد المواطنين و يُضر السياحة | فيديو
