رزان سلامة - تحدثت الشابة أسيل التي تبلغ من العمر 26 عاما عن تجربتها مع مرض السرطان الذي أصابها وهي حامل في جنينها الأول،وقالت أسيل أن ما أصيبت به هو امتحان ونجحت به من خلال ايمانها والقوة التي استمدتها من زوجها وعائلتها والأقارب ، وكانت أسيل قد شاركت الناس قصتها على صفحتها الخاصة على موقع التواصل الاجتماعي (فيسبوك) متمنية الشفاء لجميع مرضى السرطان .
هذا ما كتبته أسيل عن تجربتها مع مرض السرطان ....
بحكم سكني قريب من مركز الحسين للسرطان كنت تقريبا كل يوم اشوف المرضى خارجين من المركز و اقرأ عبارة 'السرطان لا وقت له' كنت بحكي بقلبي الله يشفيهم و يهون عليهم يا رب لانه سبحان الله الانسان ديما بفكر حاله محصن من هيك اشياء او على الاقل مش بفترة شبابه.. انا هيك كنت افكر.. مش بعمر 26 سنة.. مش و انا حامل بأول طفل إلى ... اخر شي كنت اتخيله هو انه و انا أدعي لمرضى السرطان ربنا يشفيهم انه السرطان كان عم يزيد بجسمي يوم عن يوم..
في بداية شهر 12/2016 عرفت اني حامل و طبعا كأي حامل جديد بلش التعب و التغيرات بس الغريب كان انه اعراض الحمل عندي ما كانت زي التقليدي لعية و عصبية و ما منه... كان عندي تعب شديد مش معقول ما اقدر امشي اكمن متر بدون ما ينقطع نفسي.. اشوف كدمات بجسمي مع اني ما ضربت بشي.. نريف من الانف و التهاب شديد جدا باللثة خلاني ما اقدر اكل اغلب الاشياء.. و المضحك المبكي انه شهر كامل كل ما اقرأ او اسأل عن سبب هاي الاشياء اعرف انها بتصير بسبب الحمل.. و كل واحد فيهم اله تفسير طبي مقنع جدا بس مابصير مع كل الحوامل بس فئة قليلة..
بتاريخ 26/1 بالصدفة رحت علي طبيب عام و مش عشاني عشان زوجي بده يعمل فحوصات الدم الدورية تاعت كل سنة، و لأني حامل الدكتور حكا بده يعملي فحوصات دم و فيتامينات مهو 'على التأمين'! مع انه فحوصات الحمل الدورية كانت بعد اقل من شهر بس سبحان الله بجوز لو استنيت لوقتها ما كنت عم اكتب هلكلمات هلا...
بعد بيومين و كان يوم سبت قررت اروح على طوارئ ، التهاب اللثة صار لا يطاق و نزل على حلقي و صرت مقتنعة انه رح افلوز خصوصي مع تعب العظام و المفاصل يلي صار معي و منه باخد اكمن يوم اجازة اريح فيهم! قبل ما نوصل الطوارئ رن الدكتور يلي عمللنا الفحوصات على زوجي و حكالة هلا بتاخد مرتك على طبيب دم.. ما تستنى ساعة زيادة و ما حكا شو السبب.. انا و زرجي ما فكرنا بالموضوع كتير مهو جديد صاير اي شي بصير معي من ورا الحمل و مبرر. بس وصلت للطوارئ شرحت للطبيب كل شي عم يصير معي و طلبت يعملي فحوصات دم عشان يشوف اذا فيهم اشي مش طبيعي.. بعد اقل من نص ساعة كان طبيب الطواري عندي و معة دكاترة تانين.. حسيت نظرة الشفقة بعيونهم و همة داخلين بس ما فهمت ليش.. بعدها عرفت انه عدد كريات الدم البيضا عندي 87 الف و الحد الاقصى 10 الاف.. و مع كل الاعراض يلي عندي كان التشخيص واحد .. سرطان الدم الحاد (Leukaemia- AML ) بس ما حد حكالي ليلتها عبل ما يطلع التشخيص النهائي الاكيد بناء على خزعة نخاع العظم (Bone marrow biopsy) يلي عملتها هديك الليلة و بدون تخدير عشان الجنين لانه لازم يتأكدو من منبت الدم لتحديد كتير شغلات...ثاني يوم الصبح كان التشخيص واضح و لو استنيت كمان لسبوع او اكتر كان عملي نزيف بالدماغ او الرئة كونه 95% من دم النخاع كان خلايا سرطانية.. و دغري عملو تحويل لمركز الحسين للسرطان... كأي انسان طبيعي صابني انهيار و عدم تصديق.. كيف يعني 26 سنة و معي سرطان! حسيت حالي بكابوس و تمنيت حد يصحيني منه، اول و اكتر شي فكرت فيه هو جنيني.. معقول يأثر الكيماوي عليه و افكار تانية تاخدني و تجيبني بس خلص توكلت على الله و حسب حكي Google الكيماوي ما بأثر علي الجنين بعد الشهر الرابع و انا كنت بأخر اكمن يوم بالشهر الثالت يعني خلص طفلي بأمان.. هيك تمنيت..
وصلت مركز الحسين.. هاد الصرح العظيم يلي بدين إله بالكثير .. كانو كاتبينلي ادخال فوري و ابدا كيماوي بعد يومين كونه هاد النوع من سرطان الدم شرس جدا و يتفاقم بسرعة، بدون علاج ما بكمل اكثر من 3-6 اشهر... المشكلة طلعت انه المركز ما عنده علم بحملي بسبب خربطة في بعث التقارير! و رفض ادخالي لحد ما ارجع على المستشفى و اعمل اجهاض لانه نوع الكيماوي هاد بيعمل تشوهات او اجهاض بنسبة شبه 100% كونه حملي بأوله و جسمي ضعيف جدا و اجهاض اثناء الكيماوي ممكن يتسبب بكارثة و المركز ما في قسم نسائية مجهز لهيك حالات! و الصدمة الاكبر كانت لما خبرني الطبيب انه هاد الكيماوي معه احتمال عدم الحمل مجددا في المستقبل عالية.. من بعد هلحكي سكرت الدنيا بوجهي فقدت كل امل في الحياة.. روحت علبيت انهرت بكا و خبرت زوجي اني قررت ما اتعالج و ما رح اعمل اجهاض.. على القليل بس اموت بضل قطعة مني في هالدنيا.. طبعا انجن و سحبني معه على المستشفى عشان نبدا بإجراءات العملية ولو غصب عني لانه يلي بحكي نوع من الأنتحار و ما حد رح يأييدني ، حكالي هاد الطفل ملاك من الله عشان اكتشف المرض بالوقت المناسب و اتعالج..و شو بعرفني انه السرطان ما رح يوصل للطفل و يخسرنا نحنا الاثنين و انه ربنا عنده رحمته ما بتخلص و اكيد رح يعوضنا عن كل خسارة و كل دمعة و كل لحظة ألم.... ثاني يوم كان الموضوع منتهي.. اصعب يوم بحياتي اصعب من السرطان و الكيماوي و كل شي ثاني.. كل الاحلام و التخطيطات تبخرت.. و الاواعي و الاغراض يلي كانت قمة سعادتي صارت الم و وجع...
الاسبوع يلي بعده كانت اول جرعة كيماوي إلي بمركز الحسين و كان الكيماوي بنعطى على شكل اسبوع متواصل من بدون ما ينفصل.. يعني 168 ساعة متواصلة من الكيماوي يلي بقضي على مناعتي كليا و بحتاج معه عزل كونه اقل فايروس او بكتيريا ممكن تعمل مضاعفات خطيرة. هاد الكيماوي فيه احتمالية انه يقتل اغلبية الخلايا السرطانية بتوصل 60% - 70% تقريبا و اذا ضل خلايا كثيرة لازم ارجع أعيد هاد العلاج مرة ثانية و ثالثة ممكن كمان . النتيجة كانت بتطلع بعد 3 اسابيع من اخر يوم كيماوي.. خلال فترة العلاج هاي رجعت أسيل يلي الكل بعرفها، رجعتلي الضحكة و المزح و التفاؤل و الامل.. ربنا اعطاني قوة بحياتي ما تخيلت تكون جواي و قررت بالطول بالعرض بالمنيح بالعاطل بدي امزع رقبته لهل مرض و أفرجي انو صاب الانسان الغلط.. السرطان ما رح يهزمني و الحياة اجمل و احلى من اني اكرهها.. حتى اني شلت شعري كله اول ما بلش يكت عشان ما بدي اضل افكر متى بده يوقع شعري كله و كيف بده يكون شكلي و و و... و طلع الموضوع اشي عادي بزعل اول يوم بعدها اكتشفت انه عادي انا ضليت انا ما صرت كائن مخيف و الشعر بتعوض بسنة و صحتي هي أهم شي... حتى لما تعبت و فقدت كل طاقتي و شهيتي و نزلت اكتر من 7 كيلو ب اسبوعين ضليتني قوية و امزح انه هاد الدايت يلي طول عمري بحاول اعمله!! و ضليت امزح كيف اني رحت الطوارئ عشان اخد يوم اجازة مرضية طلعلي بدالها اشهر!
في هاد النوع من السرطان بنعمل فحص جينات ببين احتمالية استجابة الجسم للعلاج ، احتمالية رجوع المرض و غيره.. في حال كانت نسبة الخطورة عالية بتم عمل زراعة نخاع دم من متبرع بكون بالعادة من العيلة و يلي فيها مشكلة بالنسبة ألي كونه عندي اخت وحدة الله يحميها و نسبة التطابق 25% بالإضافة لمضاعفات الزراعة و احتمال انه يرفض جسمي النخاع الجديد.. اما الجينات المتوسطة و الجيدة بنعطى كمان كيماوي عيار اقوى لعدة اشهر عشان المرض باذن الله ما يرجع. نتيجة هلفحوصات بتطلع مع نتيجة نجاح او فشل الكيماوي الأول. اسابيع من التوتر و التفكير بألف احتمال و الف سيناريو مع هيك كان عندي سلام داخلي و طمأنينة انه كل شي رح يكون تمام بس ضليت استنى الدكتور يأكدلي.. حسيت حالي زي يلي بستنى نتيجة التوجيهي... و بفضل رحمة الله الف حمد و شكر له طلع كلشي تمام.. في 7 آذار الدكتور خبرنا انه العلاج نجح و السرطان شبه مختفي و الجينات متوسطة و رح ابلش كيماوي مكثف مثبت الأسبوع يلي بعده.. بعمري ما تخيلت اكون مبسوطة اني رح اخذ كيماوي غير هداك اليوم..
13/3 بلشت اول جرعة كيماوي مكثف.. كان عبارة عن 3 ساعات يوميا ل 6 ايام و لمدة 4 مرات (اجمالي 72 ساعة).. مشكلته انه بوقف نخاع العظم فبتصير المناعة عندي صفر و بنزل عندي قوة الدم و الصفائح و بصير لازم اخد بدالهم و بسبب نزول المناعة صار عندي مرتين بكتيريا بالدم و كان لازم اعمل عملية لازالة جهاز وريدي مركب تحت رقبتي بشوي كنت اخذ من خلاله الكيماوي و الدم و سحب الدم لانه العروق و الشرايين بتبطل تبين مع الكيماوي يعني الشهرين بعد ازاله الجهاز كانو معاناه مع الابر و تركيب الابر لحتى يلاقو عرق مبين الحمد لله على كل حال... يوم 18/7 خبرني دكتوري العزيز د. كمال الربيع اخد اروع الأطباء في العالم انه اخر خزعة نخاع عظم كانت نظيفة و مافي اي اثر للسرطان و انه بقدر ارجع لشغلي من بعد 6 أشهر اجازة مرضية.. فعلا كانت أحلى لحظات حياتي الحمد و الشكر لله لانه رحمني و اعطاني عمر جديد.. من بعد 6 اشهر، 240 ساعة كيماوي، 44 ليلة في المستشفى، اكتر من 30 وحدة دم و صفائح و مئات الابر بقدر احكي اني تغلبت على السرطان بفضل ربنا و دعم زوجي و اهلي و أصدقائي يلي ما تركوني دقيقة لحالي.. و كل الناس يلي صلتلي و دعتلي من دون ما حتى تعرفني.. كل يلي تبرعولي بدم و صفائح انتو سبب في شفاءي و فعلا النفسية الحلوة و الشجاعة و الايمان هم نصف العلاج ..
كل الشكر لمركز الحسين بأطباءه و ممرضيه جميعا انا بفتخر فيه و ممنونه اله فوق الوصف..
في النهاية المرض هاد انا بعتبره اختبار و الحمد لله نجحت فيه و طلعت منه اقوى و احسن.. بتمنى من قلبي ما ارجع اشوفه مرة ثانية و ربنا يعوضني بكل يلي راح.. الله يبعده عنكم و عن كل احبتكم يا رب .
-
أخبار متعلقة
-
أفضل سيارات مازدا في استهلاك البنزين لعام 2018
-
الفاخوري يعلن تبرع بنك الأردن بمليون دينار أردني لصندوق "همة وطن"
-
توفيق فاخوري يدعم صندوق "همة وطن" بمبلغ نصف مليون دينار أردني
-
شاهد لحظة سقوط الطائرة الأوكرانية بعد اشتعالها في الهواء
-
مدرسة الموقر ترسم أجمل منظر – فيديو وصور
-
مدرسة الموقر ترسم أجمل منظر
-
بـرنامـج الـوكـيـل فـي إجـازة سـنـوية
-
حفرة امتصاصية في جرش .. خطرٌ يُهدد المواطنين و يُضر السياحة | فيديو
