هيك بلا خجلٍ ولا حياء ترقصين في حفلة خاصة جدّاً..؟ وَلْ؛ عرق الحيا طقّ وما فيها اختشى بالمرّة؟! ولك انت رئيسة وزراء فنلندا..! وترقصين؟! ووين؟ بحفلة؟ لا وخاصة كمان؟! يا عيب العيب..!
يلّا لملمي اغراضك .. لملمي أدوات مكياجك.. ما تخلّي لك في المكتب ولا حتى علبة ماناكير.. مش ناقصنا في العالم الكبير المحافظ مسؤولين يرقصون في حفلات خاصّة؟ إمّا أن يكون الرقص على المكشوف وإمّا على دار أهلك دوز دغري..! قال ترقص بحفلة خاصّة قال..! أهلًا أهلًا..!
وعملولك فحص مخدرات؟! تستاهلي.. مهو اللي يهزّ ويرزع رزع لازم يُعمل له ألف فحص وفحص..! وإلّا يا سانا يا مارين تفكّري الدنيا سايبة؟! ولك قاعدينلك بالمرصاد ومرصاد المرصاد..! والله لنخليكي تشوفي نجوم الظهر والعصر على كلّ شخلعة شخلعتيها في الحفلة الخاصّة..!
قدميلي استقالتك فورًا.. أنا موافق عليها.. ولن أتردد لحظة بقبولها..! وما تروحي بسيارة الدولة؛ أطلبي أوبر أو لحظة .. حتى سوّاق أوبر زعلان منك وما رح يوصلك.. تزمّي حالك وامعطيها كعّابي.. خسارة فيك الركوبة.. قال ترقص بحفلة خاصة قال..؟! أهلًا أهلًا..
سانا مارين: زعلان جدًّا منك؛ ليش ما نادتيني أرقص معك..؟!.
